Skip to Content

100 ára afmæli

Karlakórinn Fóstbræður er sá karlakór Íslands sem á lengstan samfelldan starfsaldur að baki en kórinn hefur starfað samfellt frá haustinu 1916 og hefur áratugum saman miðað aldur sinn við það ártal.

100 ára afmælinu munu Fóstbræður fagna með ýmsu móti. Bera þar hæst alþjóðlegt kóramót um hvítasunnuhelgina í maí og ýmsum viðburðum á haustmánuðum. Nánari upplýsingar um alþjóðlega kóramótið má fá á heimasíðu mótsins

Mönnum hefur lengi verið ljóst að auðvelt væri að færa haldgóð sagnfræðileg rök fyrir því að kórinn hafi tekið til starfa fáeinum árum áður og nýlega fundust gögn í fórum KFUM sem taka af allan vafa um að karlakór KFUM var stofnaður 1911 og starfaði með nokkrum blóma fram á árið 1915. Það ár lá starfsemin að einhverju leyti niðri vegna skorts á söngstjóra.

Frá stofnun og til ársins 1937 hét kórinn Karlakór KFUM og starfaði fyrst og fremst innan vébanda þess félags. Árið 1937 losnuðu tengslin við móðurfélagið og þá þótti mönnum rétt að undirstrika það með nafnbreytingu. Nafnið Fóstbræður er sótt til kvartetts sem starfaði í upphafi aldarinnar en meðal söngmanna þar var Jón Halldórsson fyrsti söngstjóri Karlakórs KFUM, síðar Fóstbræðra.

Undir þessu nýja nafni óx kórinn og efldist og hefur ávallt lagt ríkan skref til mótunar og framþróunar karlakórssöngs á Íslandi og mun gera áfram.

Nánar má lesa um sögu kórsins annars staðar á heimasíðunni og enn frekar í bókinni Fóstbræðralag eftir Pál Ásgeir Ásgeirsson sem kom út 2001 og fjallar um sögu kórsins frá upphafi til loka tuttugustu aldar.

Í tilefni af 100 ára afmælisins hefur verið sett saman myndband á Youtube, hið fyrsta af fleirum væntanlegum í tengslum við afmælið. 

 

 

 

 

 

Share this